« Back

Фармон ва ижро 31.07.2020 12:32

ОДИЛ СУДЛОВ САМАРАДОРЛИГИ ОШИРИЛАДИ

2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси асосига “Инсон манфаатлари ҳамма нарсадан улуғ”, “Халқ давлат идорларига эмас, балки давлат идорлари халқимизга хизмат қилиши керак” деган ҳаётбахш тамойиллар қўйилди. Ўтган қисқа даврда мамлакатимизда давлат идоралари халққа хизмат қиладиган, уларнинг фаолиятига халқ баҳо берадиган тизим яратилди. Ҳаётимизнинг турли соҳаларига доир қарорлар халқимиз билан бевосита мулоқот, одамларнинг хоҳиш-истаклари асосида қабул қилинмоқда. 

Давлатимиз раҳбарининг жорий йил 24 июлдаги “Судлар фаолиятини янада такомиллаштириш ва одил судлов самарадорлигини оширишга доир чора-тадбирлари тўғрисида”ги фармони  суд-ҳуқуқ соҳасини ривожлантириш борасидаги изчил ислоҳотларнинг мантиқий давоми бўлди.

Биргина фармонда фуқароларнинг одил судловга бўлган ҳуқуқини амалда таъминлаш билан боғлиқ долзарб муаммога алоҳида эътибор берилиб, вилоят даражасидаги ва унга тенглаштирилган фуқаролик, жиноят ишлари бўйича судлар ва иқтисодий судлар негизида судьяларнинг  қатъий ихтисослашувини сақлаб қолган ҳолда Қорақалпоғистон Республикаси, вилоятлар ва Тошкент шаҳри умумюрисдикция судларини ташкил этиш назарда тутилган.

Умумюрисдикция судларининг ташкил этилиши илғор хорижий давлатлар – Франция, Италия, Канада, Жанубий Корея, Қозоғистон, Беларусь ва бошқа давлатлар иш фаолиятига асосланилди. 

Фармонда яна бир муҳим масала – маъмурий судлар тузилмаси ва фаолиятини такомиллаштириш вазифаси белгиланган.

Оммавий-ҳуқуқий  низоларни кўришга ихтисослашган маъмурий  судларга ўз табиатига кўра жиноят ишига ўхшаш маъмурий ҳуқуқбузарликка оид ишларни кўриш ҳам юклатилган бўлиб, биргина оммавий-ҳуқуқий муносабатлардан келиб чиқувчи низоларни атрофлича ва сифатли кўриб чиқиш имконини чеклаш ҳоллари амалиётда кузатилди. Хусусан, маъмурий судларда  2020 йилнинг 6 ойи давомида маъмурий ҳуқуқбузарликка оид 183 мингта иш кўриб чиқилган.

Эндиликда  туман (шаҳар) маъмурий судлари негизида Қорақалпоғистон Республикаси, вилоятлар маркази ва Тошкент шаҳрида туманлараро маъмурий судлар ташкил этилади. Бунда асосий эътибор нафақат судларга бўлган ташқи таъсир ва аралашувларни  бартараф этишга,  балки мазкур тоифадаги ишларнинг ҳажмидан келиб чиқиб, бутун республика бўйича судьялар ўртасида тенг иш ҳажмини тақсимлашга ҳам қаратилади.

Маъмурий ҳуқуқбузарликларга оид ишларни кўриб чиқиш ваколати жиноят ишлари бўйича судларга ўтказилиши ҳам бежиз эмас. Шу муносабат билан 203 та туман (шаҳар) маъмурий судини мақбуллаштириб, уларнинг негизида вилоят марказларида 14 та туманлараро маъмурий суд ташкил этилади ҳамда мақбуллаштириш натижасида бўшаётган 150 та судья ва 150 та суд ходими штат бирликлари иш ҳажми юқори бўлган бошқа судларни тўлдиришга йўналтирилади.

Фармонда суд-ҳуқуқ ислоҳотларини тўлдирадиган бошқа жиҳатларга ҳам алоҳида эътибор қаратилган бўлиб, бу келгусида одил судлов самарадорлигини оширишга хизмат қилиши билан аҳамиятлидир.

 Дурдона Дадахонова,
Жиноят ишлари бўйича Чилонзор тумани суди судьяси